सप्तरी ७ असोज । सप्तरीको डाक्नेश्वरी नगरपालिकामा अज्ञात समूहले एक जनालाई गोली प्रहार गरेको छ ।
वडा नम्बर ७ ब्रहमपुरका २४ वर्षीय भगवती मण्डलमाथि गएराति भारतीय नम्बरको मोटरसाइकलमा आएका दुई जनाको समूहले गोली प्रहार गरेर घाइते बनाएको सप्तरी प्रहरीले जनाएको छ। उनको बायाँ हातको पाखुरामा गोली लागेको छ ।
पाखुराबाट अत्यधिक रगत बगेर राजविराजस्थित गजेन्द्रनारायण सिंह अस्पतालमा उपचार सम्भव नभएपछि धरानस्थित बि.पी. कोइराला स्वास्थ्य विज्ञान प्रतिष्ठान रेफर गरिएको अस्पतालका अहेव सन्तोष मेहताले बताए ।
राजविराजबाट स.११ प १३६६ नम्बरको मोटरसाइकलमा घर गइरहेका मण्डलमाथि डाक्नेश्वरी नगरपालिका– ८ विषहरिया टोलस्थित कोशी पम्प नहरनजिक अज्ञात समूहले गोली प्रहार गरी फरार भएको घाइते मण्डलले बताए ।
